أحدث نكتة .. أقباط يعترضون علي أغنية عبد الحليم حافظ (( أحلف بسماها وبترابها ))

أحدث نكتة .. أقباط يعترضون علي أغنية عبد الحليم حافظ (( أحلف بسماها وبترابها )) لأن
الانجيل يقول : لا تحلفوا بالسماء فهي كرسي الله ولا بالأرض لأنها موطئ قدمه والأبنودي يعلق ساخراً

- بعد مرور 43 سنه علي أغنية "أحلف بسماها " للعندليب الاسمر عبد الحليم حافظ التي غناها عام 1967من كلمات عبد الرحمن الابنودي والحان كمال الطويل والاغنيه التي وعد حليم ان يغنيها في كل حفلاته الي ان تتحرر ارض مصر في سيناء

-انا بطلت أكتب نثر وبعدين أنا مش ببقي قاصد اني اكتب شئ معين هي الحاجة بتيجي كده لوحدها

اثار بعض من الاقباط غضبهم وطرحوا فكره غريبة بان عبد الحليم وعبد الرحمن الابنودي يحرضان علي معصية الله لانه مكتوب في الانجيل لا تحلفوا بالسماء لانها كرسي الله ولا بالارض لانها موطئ قدميه .

فسالنا القمص عبد المسيح بسيط المتحدث الاعلام للكنيسه الارثوذوكسيه فقال

مكتوب في انجيل متي الاصحاح الخامس (( لاَ تَحْلِفُوا الْبَتَّةَ لاَ بِالسَّمَاءِ لأَنَّهَا كُرْسِيُّ اللَّهِ ، وَلاَ بِالأَرْضِ لأَنَّهَا مَوْطِئُ قَدَمَيْهِ وَلاَ بِأُورُشَلِيمَ لأَنَّهَا مَدِينَةُ الْمَلِكِ الْعَظِيمِ.، وَلاَ تَحْلِفْ بِرَأْسِكَ لأَنَّكَ لاَ تَقْدِرُ أَنْ تَجْعَلَ شَعْرَةً وَاحِدَةً بَيْضَاءَ أَوْ سَوْدَاءَ. ،بَلْ لِيَكُنْ كَلاَمُكُمْ: نَعَمْ نَعَمْ لاَ لاَ. وَمَا زَادَ عَلَى ذَلِكَ فَهُوَ مِنَ الشِّرِّيرِ.))

هنا الامتناع عن الحلف تماما ولكن اغنية عبد الحليم هذه مجرد كلمات شعريه كتبها الابنودي تعبر عن مشاعر وطنيه ولا تدخل في التطبيق العملي بمعني لا يوجد احد يقف في محكمة مثلا ويحلف بسماء مصر او بارض مصر او يلحف امام شخص . فهذا تعبير بلاغي يوحي بشدة الحب للوطن واحنا ناس غير حرفيين في استخدام الكلمات والالفاظ . ومن يثير ذلك فهم من يتعاملون بحرف الكلمه وليس بروح الكلمة ، ونحن نقول دائما الحرف يقتل .

ومن جانبه قال الشاعر عبد الرحمن الابنودي
الحقائق كلها اصبحت نكته في الزمن دا

الاقباط زعلانين لأن عبد الحليم بيغني اغنيه احلف بسماها وبتربها ولان الانجيل بيحرم الحلفان بالسماء لانها كرسي الله والارض لانها موطئ قدميه .فما تعليقك؟

احنا ماقلناش علي السماء بتاعة اله المسيحيه واله الاسلام احنا قلنا علي سماء مصر واحنا خدنا حتي قدا كدا وغنينا ليها وسبناله سماء الكون كله .

وبعدين انا دفعت رشوة للمسيح علشان ما يزعلش وكتبتلوا ،
(( يا كلمتي لفي لفي الدنيا طولها وعرضها ، وفتحي عيون البشر للي حصل علي ارضها
علي ارضها طبع المسيح قدمه ،
علي ارضها نزف المسيح ألمة
في القدس في طريق الالام ،
وفي النخيل رنت تراتيل الكنايس
في الخلا صبح الوجود انجيل
لامتي تفضل تضيع فيك الحقوق
لامتي ياطريق الالام
وينطفي النور في الضمير
وتنطفي نجوم السلام
ولامتي فيك يمشي جريح
ولامتي فيك يفضل يصيح
مسيح ورا مسيح علي ارضها .
تاج شوك فوق جبينه
وفوق كتفه الصليب
دلوقتي ياقدس ابنك زي المسيح غريب ، غريب
تاج الشوك فوق جبينه
وفوق كتفه الصليب خانوه
خانوه نفس اليهود
ابنك يا قدس زي المسيح لازم لازم لازم يعود علي ارضها.

لو كانوا الفلسطينيون واليهود حبوا سماء وارض فلسطين وغنولها زي ما احنا حبينا مصر وعنينا لها ما كان يجري فيها اللي بيجري .

مصر أهلها أحبوها وغنولها اقباط ومسلمين اللي بيحصل دا ، دا كله غريب علي المصريين ، انا حتي كنت بتكلم مع ناس فقولت لهم ليه ما تعملوا نجع حمادي وفرشوط زي ما عملتوا محافظة الاقصر بس تسموها محافظة الشر كام حاله بنسمع عنها كل يوم من مشاكل بين مسلمين ومسلمين في المنطقه دي وبقي في مصر في شيعه وسنه وفي نوبي وسيناوي وعربي هواري مادام انت قولت في مسيحي ومسلم استحمل بقي . وقت جمال عبد الناصر ما كنا نسمع عن دا كله .
وانا كاتب احلف بسماها وبترابها احلف بدربها وابوابها احلف بالقمح وبالمصنع احلف بالمدنة وبالمدفع ، يعني انا هقوم احلف بالابواب وبالمصانع دلوقتي ؟!!
واحنا غنينا للسماء والارض اللي حبينها واذا المسيح زعل يبقي يكتبها بقي في دفتره ويوم القيامه نبقي نتناقش في الموضوع دا انا وهو مع بعض.

هل الاغنيه كانت مكتوبه لجمال عبد الناصر لانه كان يريد توحيد الامه العربيه؟
انا عمري ما كتبت اسم حد ، والاغنية كنت بكتبها لينا احنا ، وبنغنيها احنا ، دا ماجدة الرومي اللبنانيه بتغنيها .

امتي هتكتبلنا قصيده جميله بالمعاني الحلوه دي تاني؟
انا بطلت اكتب نثر وبعدين انا مش ببقي قاصد اني اكتب شئ معين هي الحاجه بتجي كدا لوحدها .